بسم الله الرحمن الرحيم
أذكر لما كنت موجود في الدوحة قبل السفر للابتعاث بالخارج، ما كنا نحتفل إلا بعيد الإستقلال (مدري إذا للحين في ناس متذكرينه ولا نسوه). لما تخرجت من الجامعة ورجعت إلى قطر نهاية ٢٠٠٩، لاحظت وايد ناس يتكلمون عن اليوم الوطني والاحتفال به. بصراحة حسيت إني جيت من كوكب آخر. فجأة تذكرنا إن فيه يوم وطني وبدينا نحتفل به. وين كنا من ذاك الوقت وشاللي خلانا نتذكره الحين؟ بصراحة ما أعرف.
أنا ما اعترض ومب ضد فكرة الإحتفال باليوم الوطني بالمرة، ولكنه تسأؤل عن تصرفات بعض الناس اللي لا يحتفلون لمجرد أنه يوم وطني ولكنهم يحتفلون لمجرد إنه يوم إجازة وفلة ووناسة ونقدر نستعرض بالمواتر ... الخ وطبعا كلن على حسب هواه في الاحتفال.
متى راح نرجع لأصل الموضوع؟
إحنا ليش نحتفل بهاليوم؟
شاللي نعرفه عن قطر أو عن مؤسس قطر؟
هل هناك كتاب أو فيلم وثائقي يتكلم عن سيرة مؤسس قطر عشان القطري وغير القطري يعرف شسالفة؟
الكلام عن المؤسس قليل وبصراحة ترى فيه ناس وايد مثلي ما يدرون عن المؤسس إلا اسمه واللي تعملناه من المدرسة أو اللي قريناه من ويكيبيديا
طبعا، ما أحب أهمل الناحية الإيجابية من الإهتمام بتوضيح النقاط عن تاريخ قطر اللي كانت غايبة حتى عن وايد من شباب هالجيل، وشغلات بخصوص المصاعب اللي لاقوها أجدادنا وظروف الحياة الصعبة اللي مروا بها عشان جيلنا يعيش في راحة وأمان.
حب الوطن شي جميل بس يا ريت ما يكون يوم واحد بالسنة.
شي جميل إنك ترى غير القطري يعبر عن فرحته بهاليوم ويمكن فرحان أكثر منك يالقطري.
شغلة أحب أركز عليها بخصوص هاليوم. يا ريت نعبر عن روح الوحدة بين هل قطر بغض النظر عن القبيلة والأصل. بالعربي الفصيح، ما في داعي كل قبيلة يكون لها عرضة بروحها. أنا بصراحة ما أدري شالرسالة اللي القبايل تبي توصلها للمواطنين والمقيمين من هالفعل؟
شالمانع إن كل القبايل تتحد في هاليوم ويكون لهم عرضة واحدة ويسمونها عرضة هل قطر؟
شالمانع إنه في هاليوم، ما نتعامل بالإسم الأخير؟ ليش نظل نتعامل بطريقة إنت ولد فلان وأنا ولد علان؟ كلنا عيال هالبلد أولاً وآخراً.
أحب أختم وأقول، ودي في اليوم الوطني أطلع بالموتر وأسوق بكل راحتي من غير زحمة وإزعاج، ممكن؟
No comments:
Post a Comment